يعنى ايه ثورة بجد ؟؟؟
ثورة يعنى ترفض وتقول لأ للفساد والظلم
يعنى تقوم من مكانك كده زى الشاطر وتتحرك وتعمل اللى يرضي ربنا عليك واللى يرضي ضميرك
يعنى تقوم وتقف وتتحرك وتحاول تعمل نهضه فى بلدك
يعنى لما أعمل ثورة ميتقالش عليا ماسونى وعيل سيس وبلطجى
وبتاع أجندات وكنتاكى اللى بتأكلنى وبتتعطف عليا
يعنى تحافظ على ثروة بلدك من السرقه
يعنى أول ما تشوف حرامي تبقي متأكد انه هيتحاكم محاكمة عادلة
وأكيد مش هياخد براءة
يعنى لما حد يقتل يتحاكم مش نشكره ونديله براءة
يعنى لما رئيس يغلط او وزير يسرق او مسئول يتهاون تبقي عارف ومتأكد ان ليلته اسود منها مفيش
وان مفيش حد هيأكل حق حد
يعنى لما تبقي ماشي فى الشارع تبقي ماشي وانت مطمأن وحاسس بأمان
متبقاش خايف تتكلم احسن تروح فى ستين داهيه
يعنى تعيش عيشة فل وعايش مبسوط ولاقي شغل كويس وبيت محترم ومرتب يعيشك انت وأسرتك عيشة تمام
يعنى تشارك فى كل حاجة بتحصل فى البلد
تشارك فى السياسة والاقتصاد والنهضه والتعليم وفى كل حاجة
يعنى مترميش ورقه فى الشارع وتحافظ على المكان اللى انت ماشي فيه
يعنى تتعلم ونعلم صح
يعنى يطلع من تحت إيدك جيل تفتخر بيه ومش انت لوحدك اللى تفتخر بيه مصر كمان تفتخر بالجيل ده
يعنى لما اتظلم الاقي العداله تنصفنى
يعنى أعيش زيي زى اى حد من غير وسايط ولا محسوبيات
يعنى ميبقاش فيه شاي بالياسمين فيكى يامصر
يعنى لما نعمل ثورة يبقي لازم تكون ثورة بجد
وانا عن نفسي مبقبلش بنص ثورة
ياثورة كاملة وناخد حقنا كامل متكامل
ياما الحرامية يرجعوا يمسكوا البلد من تانى ونبقي نستاهل بقي ناخد على دماغنا
عشان كده لازم ننزل ونرفض ونقول لأ لسرقه الثورة
لأ للظلم
وعاوزة حقي وحق كل شهيد أستشهد فيكى يامصر
دم الشهداء مش هيروح هدر .. لانهم ضحوا عشانى وعشانك
ضحوا بأرواحهم عشان مصر تبقي احسن وعشان مصر تبقي انقي
عاشقة الوطن
8/7/2011
--------------------oOo--------------------
0 Comments:
Post a Comment
Links to this post:
Create a Link
<< Home