عاشـــــقـــــة وطـــــــنـــــــى ومــالــــي حـــيره غـــير طـــــرد حــــكــامــــك العيــــــــره

قولتها زمان من سنين وهرجع أقولها تانى "عاشـــــقـــــة وطـــــــنـــــــى ومــالــــي حـــيره غـــير طـــــرد حــــكــامــــك العيــــــــره"
وعشان حكامك العيره لسه قاعدين ومربعين احنا مش هنسكت عن حقنا وحق دم شهدائنا الثوار الأحرار
دم كل شهيــــــــــد بينادى علينا ،، قلب أمهاتهم وآبهاتهم بيقولولنا قلبنا محروق واحنا بنقولهم هنطفي نار قلبكم وهنرجع حق ولادكم ان شاء الله ،، أى نعم مش هنقدر نرجع ولادكم للدنيا تانى بس هنجيب حقهم مش هنسيبه ان شاء الله

الـــثـــــــوره لــــــســـــــه مــــــــســـــــــتـــــــــــمـــــــــــــــره

وعشان اللى بيقولوا استقرار وبيقولوا كفايه خربتوا البلد
وللى راضيين بالذل والخنوع
واللى موافقين على بكره يكون زى النهارده وزى امبارح
واللى عاوزين ينداس علينا ونفضل مبسوطين وناخد على قفانا ونقول كمان ونفضل برضه مبسوطين
للي شايف ان مبارك كويس وطنطاوى حلو والمجلس زى الفل
للى شايف عكاشه وزبايدر ولكل متواطئ مع اللى بيحصل واللى بيقبل انه يتنازل عن دم الشهداء هما الصح وبس للاخوان والسلفيين اللى بيتسابقوا على الكراسي وبيتهموا الثوار بالمفسديين وخروج على الحاكم
للي بيتطاطى وبيقبل بالجزم تدوس على رقبته
أحب أقولكم حاجه بسيطه وأوضح حاجه يمكن تكون غايبه عنكم
وده أكيد لان انتم مبتفكروش او دماغكم صدت من زمان من كتر ما مبارك عمل فيكم

احنا نازلين ومكملين والثوره مستمره ... نازلين عشان دم الشهيد وحقه وحلمه
نازلين عشان عيون حراره ورضا وكل واحد اتصاب عشان حقنا يرجع
نازلين عشان أطفال الشوارع المتهانين اللى ملهمش نسب ولا أصل ولا فصل وبياكلوا من الزباله وبيناموا في الشارع نازلين عشان الامراض اللى انتشرت فى بلدنا والوباء اللى عيشنا فيه
نازلين عشان تعليمنا المتدنى اللى ملوش اى لازمه
نازلين عشان حقنا اللى بيتسرق من زمان واحنا متكتفيين وساكيتن
نازلين عشان فلوسنا وثروتنا اللى بتتنهب من 30 سنه
نازلين عشان احنا عملنا ثوره عشان الحق يرجع ولسه برضه مرجعش
نازلين عشان لسه النظام مسقطش
نازلين عشان مبارك هو اللى لسه بيحكم مصر
نازلين عشان طنطاوى بيستعبط بصراحه وفاكر انه بيدينا على قفانا يبقي اكيد ثورتنا مستمره
وعمرها ما هتنتهى غير لما حقنا يرجع وحق الشهداء والمصابين يرجع
ويااما يرجع حقنا بالحق والعدل ياإما احنا هناخده بإيدينا
ماهو هناخد حقنا هناخده بالذوق او بالذوق برضه حقنا لازم يرجع

والـــــثـــــــــــــوره مـــــــــــســــــتــــــمـــــــــــره وحــــــــــــق الــــــشــهــــيـــد لازم يــــــــرجــــــــع ، وعـــيــــون حــــراره مـــش هـــتــــروح بــــــــــلاش

كل سنة وأنتى طيبه يامدونتى ياحبيبتى

مدووووووووونتى حبيبتى "طآآن بس جنان" عيد ميلادها الخامس النهارده

كل سنة وانتى طيبه يامدونتى ياحبيبتى ويارب تفضلي معايا على طول

كل سنة وانتى اللى بفضفضلك وكل سنة وانتى على طول بتسمعينى

كل سنة وانتى بخير

والله كبرتى يامدونتى وبقي عندك 5 سنين يارب يزيد ويبارك يارب

والسنه ديه أحلي سنه تمر عليا وأنتى معايا

عشان السنه ديه حصل فيها حاجات كتير .. فيه الحلو وكان فيها كتير وحش الحمدلله على كل شئ

هو فيها حاجات مكنتش حلوه للأسف بس فيها حاجه كانت من أحلي وأجمل الحاجات فى حياتى ربنا عوضنى بيها عن الحزن اللى شوفته وفقدان الأشخاص اللى كنت بحبهم

بس ربنا كريم الحمدلله واستجاب لدعاوى اللى بيحبونى

يارب دايما يامدونتى أشوفك معايا وفاتحه ليا صفحاتك وبكتب فيكى زى ماانا عاوزه

ودايما بشتكيلك وبجري عليكى وأقولك على اللى في قلبي

ودايما تسيبلي كل صفحه أكتب فيها زى ماانا عاوزه ان شاء الله حتى أكتب قصة حياتى

شكرا كتييييير على كل حاجه وشكرا انك استحملتى ال5 سنين دول من غير ما تشتكى منى

ويارب عقبال 50 سنه كمان وانتى بتسمعينى
بحبك يامدونتى ياحبيبتى

كل سنة وأنتى معايا دايما

شكرا مدونتى

ربيع قلبي ابتدا :)

ربيع قلبي أبتدا

قلبي الأخضر المليان بالندى

حبي ليه شكله هيبقي كله هنا

يارب يسعدنى بيه ويسعد قلبه وقلبي معاه

شكله ربيع قلبي خلاص هيفضل على طول ربيع ومش هيجى ابدا الخريف ان شاء الله

يارب يكون ربيع على طول بكل أزهاره وورده وكل مافيه من خضره

وكل ألوان الحب

ربيع قلبي معاه غير اى ربيع تانى .. مختلف .. غريب ،، وجميل طول ماهو معايا

بدأت أحب قلبي من تانى

ولسه يدوبك بدأت أعرف يعنى ايه حب

قلبي يؤلمنى

قلبي يؤلمنى

حزين

الحمدلله على كل شئ

معرفة الناس كنوز

معرفة الناس كنوز

زى ما دايما بنسمع فى المثل بيقولوا " معرفة الناس كنوز"

كل ما تعرف شخص جديد فى حياتك بتكسب حاجات كتير اوى

اكتسبت شخصيه جديده بابتسامه مختلفه بقلب مختلف بتفاصيل فى حياته مختلفه واكيد هتتعلم منها

غير انك بتكسب أشخاص مع الايام ممكن يتحولوا لاصدقاء حقيقيين

معرفة الناس مش مجرد معرفة وخلاص على كده .. لألأ .. ديه معرفة لازم تطلع منها كسبان

واوعى تخسر فيها مهما كان

اوعى لا تخسر نفسك ولا تخسر الناس اللى عرفتها

ولو خسرت ساعتها الخساره هتبقي كبيره وغاليه وممكن متقدرش تعوضها

لانك كل ما تخسر اللى حواليك كل ما هتقفل باب فى حياتك

والباب ده كان مصدر خير او حب الناس اللى حواليك ليك

أعرف كل الناس الحلو منهم والوحش

حافظ على الحلو

وحاول تغير من الوحش للاحسن

اتعلم من الناس واياك تخسرهم

اتعلم من الناس وعلمهم الخير والحب والتسامح والقوه والرضا

علمهم ازاى يمشوا فى الطريق مع صديق بقلبه النقي والبرئ من غير لا غش ولا تزويق

احفظ ابتسامتهم واياك تحول ابتسامتهم لحزن او زعل

حافظ على قلوبهم واياك تكسرها بسوء فهم منك او بتعامل غير متوقع

لو خسرت حد منهم يبقي انت خسرت نفسك والخساره هتبقي كبيره وهتندم عليها

خلي كل الناس اصحابك وحبايبك وقرب على قد ما تقدر من اللى ينفع تقرب منهم

حياتك أجمل بمعرفة الناس "اللى تستاهل انك تعرفها"

واللى ميستاههلش اديك عرفته قيمتك فى حياته كانت هتفرق معاه ازاى لو كان حافظ عليك

يبقي احنا لازم نطبق المثل ونفهمه قبل اى حاجة " معرفة الناس كنووووووووز وجواهر كمان "

ربنا مايحرمنيش من كنوزى وجواهري ياارب

الـصــديــــق

الصديق
كلمه لها معنى كبير وعميق ومش اى حد يستحقها غير اللى يقدر قيمتها